ახალგაზრდობა და განათლება 28.აპრ.2011
საქართველოს გაეროს ასოციაციამ გაეროს განვითარების ფონდის (UNDP) მხარდაჭერით დაიწყო სასკოლო მოდელირების ახალი სეზონი. სასკოლო მოდელირება ჩატარდება ქვეყნის მასშტაბით შერჩეულ რვა სკოლაში. ქალაქ თბილისის 42-ე, 161-ე, 23-ე საჯარო სკოლების, პირველი კლასიკური გიმნაზიის, ბაქსვუდის საერთაშორისო სკოლის, ახალციხის, გორის და ქუთაისის საჯარო სკოლების მე-10, მე-11 და მე-12 კლასის მოსწავლეებს შეუძლიათ ჩაერთონ აღნიშნულ პროექტში. ყველა სკოლაში ჩატარდება საინფორმაციო შეხვედრა,რომელზეც დასწრება შეუძლია ნებისმიერ მსურველს. საინფორმაციო შეხვედრის შესახებ ინფორმაცია განთავსდება სკოლებში. რადგან ეკოლოგიური პრობლემები იქცა მნიშვნელოვან საკითხად თანამედროვე მსოფლიოსთვის, რადგან უკანასკნელი რამდენიმე წლის განმავლობაში კლიმატის ცვლილებამ მთელ რიგ ქვეყნებს გამოუსწორებელი ზიანი მიაყენა და რადგან 2011 წელი გაეროს მიერ გამოცხადდა ტყეების საერთაშორისო წლად, გაეროს შიდა სასკოლო მოდელირების თემად შეირჩა ეკოლოგიური მდგრადობა.
სიმულირებული იქნება გაეროს მდგრადი განვითარების კომისიის სხდომა. მე–20 და 21–ე საუკუნეებში მსოფლიოს ინდუსტრიულმა განვითარებამ უარყოფითი გავლენა იქონია ბუნებრივ გარემოზე. საერთაშორისო ორგანიზაციები დღესაც აქტიურად მუშაობენ გლობალური დათბობის გამომწვევი მიზეზების აღმოფხვრაზე.
პროგრამის ფარგლებში ორგანიზატორები გამართავენ საინფორმაციო შეხვედრებს აღნიშნულ სკოლებში და სასკოლო მოდელირებისთვის შერჩეულ ბავშვებს ჩაუტარებენ დამატებით ტრენინგებს. ტრენინგების დროს სკოლის მოსწავლეები შეძლებენ მიიღონ ინფორმაცია და გაეცნონ სასკოლო მოდელირების არსს, გაეროს მდგრადი განვითარების კომისიის მუშაობის მექანიზს, დელეგატის ქცევის წესს, პროცედურულ თავისებურებებს, დაეუფლონ დებატების კულტურას და დიპლომატიურ ეტიკეტს.
სასკოლო მოდელირება დაეხმარება ახალგაზრდა დელეგატებს თავიანთ თავში აღმოაჩინონ და განავითარონ საჯარო გამოსვლის, დებატების, გუნდურად ეფექტურად მუშაობის და კვლევის უნარი. როლური თამაში საშუალებას მისცემს თითოეულ მათგანს გაიგონ რა ურთიერთქმედება არსებობს სხვადასხვა სახელმწიფოების მიერ განხორციელებულ პოლიტიკას შორის და რა სახის ზეწოლას იყენებენ ქვეყნები მსოფლიო მნიშვნელობის საკითხების განხილვისას.
|
