ზოგადი

17.თებ.2011

11 თებერვალს, იუსტიციის სამინისტროში პროექტ „ჩემი უფროსი მეგობრის" გარშემო მრგვალი მაგიდა გაიმართა. განხილვაში მონაწილეობდნენ ომბუდსმენის ოფისის წარმომადგენლები, გაეროს ასოციაციისა და არასამთავრობო ორგანიზაციების წარმომადგენლები და იუსტიციის სამინისტროს თანამშრომლები. საუბარი ეხებოდა პროექტის შემდგომი განვითარების ეტაპებს და სამოქალაქო საზოგადოების მხარდაჭერის მობილიზაციას ამ პროექტის ირგვლივ. 

„ჩემი უფროსი მეგობარი" იუსტიციის სამინისტრომ და გაეროს ასოციაციამ ერთობლივად შეიმუშავეს. პროექტი 2011 წლის იანვრიდან ამოქმედდა და მიზნად ისახავს სხვადასხვა ტიპის პრობლემების მქონე (მათ შორის კანონთან კონფლიქტში მყოფ) არასრულწლოვნებზე ზრუნვას, რომლებიც საჭიროებენ დამატებით პოზიტიურ ზეგავლენას.

პროგრამის ფარგლებში ხდება არასრულწლოვანის და ზრდასრული მონაწილეების შერჩევა კონკრეტულ კრიტერიუმებზე დაყრდნობით. პროგრამის კოორდინატორი უმცროს და უფროს მეგობარს არჩევს მათ საერთო ინტერესებზე და ხასიათზე დაყრდნობით. შერჩევის პროცედურის დასრულების შემდეგ, ხელი ეწერება ხელშეკრულებას, რომლის მიხედვითაც უფროსი მეგობარი ყოველ კვირა გარკვეულ დროს უთმობს თავის უმცროს მეგობარს, აძლევს მას რჩევა-დარიგებებს, მონაწილეობს მასთან ერთად სპორტულ და გასართობ ღონისძიებებში.

პროექტის მიზანია არასრულწლოვანის ნდობის ამაღლება უფროსების მიმართ, სწავლის მიმართ დამოკიდებულების შეცვლა, მეგობრების შეძენა, კონტაქტების დამყარება და წარმატებისკენ სწრაფვა, საზოგადოების მიმართ პასუხისმგებლობის გრძნობის ამაღლება.