ახალგაზრდობა და განათლება 10.ოქტ.2010
საქართველოს გაეროს ასოციაციამ თბილისის ექვს უნივერსიტეტში გაეროს მოდელირების კონფერენცია ჩაატარა. ილიას სახელმწიფო უნივერსიტეტის, შავი ზღვის საერთაშორისო უნივერსიტეტის, ქართულ-ამერიკული უნივერსიტეტის, თბილისის სახელმწიფო უნივერსიტეტის, საქართველოს უნივერსიტეტისა და თბილისის ეკონომიკურ ურთიერთობათა უნივერსიტეტის სტუდენტებმა გაეროს მოდელირების კონფერენციაზე ბავშვთა და ქალთა ტრეფიქინგის საკითხი განიხილეს. შიდასაუნივერსიტეტო გაეროს მოდელირების კონფერენციის მონაწილეები СV-ის, სამოტივაციო წერილისა და გასაუბრების საფუძველზე შეირჩნენ. მონაწილეებმა იმსჯელეს გაერთიანებული ერების ორგანიზაციის დღის წესრიგის ერთ-ერთ მთავარ თემაზე „ბავშვთა და ქალთა ტრეფიქინგზე“, დასახეს პრობლემის მოგვარების სხვადასხვა გზები, სხდომის დასასრულს კი შეიმუშავეს რეზოლუციები, რომელთაგან საუკეთესოც კენჭის ყრის შედეგად ხმათა უმრავლესობით მიიღეს. გაეროს მოდელირების კონფერენციის მონაწილეებმა შეიძინეს პრაქტიკული უნარ-ჩვევები ეფექტური პრეზენტაციების, დებატების წარმართვისა და გუნდური მუშაობის თვალსაზრისით. შეძენილი ცოდნა სტუდენტებს დაეხმარებათ საკუთარი წვლილი შეიტანონ სამოქალაქო საზოგადოების განვითარების პროცესში. შიდასაუნივერსიტეტო კონფერენციაში მონაწილე ექვსი საუკეთესო დელეგატი გაეროს მოდელირების ეროვნული მასშტაბის კონფერენციაში მიიღებს მონაწილეობას, რომელიც 24 ოქტომბერს სასტუმრო „შერატონ მეტეხი პალასში“ გაიმართება. გაეროს მოდელირების კონფერენციები საქართველოს გაეროს ასოციაციის ორგანიზებითა და გაეროს განვითარების პროგრამის მხარდაჭერით ჩატარდა. თუ გსურთ გაეროს მოდელირების კონფერენციაში მონაწილეობა, დაუკავშირდით საქართველოს გაეროს ასოციაციის სათაო ოფისს.
|
